Berpirsên Sakaryaspor û kanala televizyonê ya Tv264, îddia kirin ku di yariya navbera Amedspor û Sakaryasporê de, lîstikvanê Amedsporê Mansûr Çalar, bi jilêtê êrîşî lîstikvanekî Sakaryasporê kiriye. Amedsporê jî bi daxuyaniyekê ew îdia red kirin û diyar kir ku hewl didin li dijî me operasyoneke têgihîna şaş bidin destpêkirin.

Di çarçoveya Lîga Sipî ya Federasyona Fûtbolê ya Tirkiyê de yekşema borî li Amedê, yariya Amedspor û Sakaryasporê hatibû encamdan. Yarî bi encama 1 û 1 bi dawî bûbû.

Piştî yariyê, berpirsên Sakaryaspor û kanala televizyonê ya Tv264, angaştin ku di kêliya yariyê de lîstikvanê Amedsporê Mansûr Çalar, bi jilêtê êrîşî lîstikvanekî Sakaryasporê kiriye.

Piştî van angaştan, Klûba Çalakiyên Werzîşî ya Amedê (Amedspor), bi daxuyaniyekê bersiv da wan angaştan. Di daxuyaniyê de hate gotin ku “Ev angaşt, teqez ne rast e û tê xwestin ku klûba me wek hedef bidin nîşandan.”

Di daxuyaniya Amedsporê de hatiye diyarkirin ku piştî yariya Amedspor û Sakaryasporê, lîstikvanên Sakaryasporê û dezgeha weşanger (Tv264), di derbarê lîstikvanên wan de nûçeyên bêbingeh weşandine û ji ber vê yekê, wan pêwîstî bi belavkirina vê daxuyaniyê dîtiye. Di daxuyaniyê de wiha hatiye gotin:

“Di yariya Amedspor û Sakaryasporê de, lîstikvanê Sakaryasporê Dilaver Guçlu, bi taybetî di kêliya ku sirûda netewî (ya Tirkiyê) hat xwendin de, bi liv û bizavên xwe, lîstikvan û temaşevanên me pir hêrs kirin. Ev lîstikvan, li gel vê, kêliya ku gol avêt jî hate ber holika me ya yedekan û bi bizavên dest û lingan lîstikvan û temaşevanên me bêhtir hêrs kir. Ji ber bizavên vî lîstikvanî, yarî di rewşeke hêrsoyî de qediya. Her çend di destê lîstikvanê me Mansûr Çalar de ti alavek tunebe jî, di dîmenên ku Tv264 de hatine weşandin de, logoya kanalê hatiye rakirin û ji bo ku weke di destê wî de jilêt heye bê xuyakirin, îşaretek li ser dîmen hatiye danîn. Ger ku dîmenên medyaya civakî bêne temaşekirin, dê bê dîtin ku di destê lîstikvanê me Mansûr Çalar de ti tiştekî tune ye.”

Di daxuyaniyê de hate diyarkirin ku dê Amedspor, di derbarê lîstikvanê Sakaryasporê Dilaver Guçlu de li federasyona Tirkiyeyê serdana gilî bike û hate gotin ku “Ev operasyona têgihîna şaş, derî rastiyê ye û armanc ewe ku klûba me wek hedef bê nîşandan.