Li Hesekê, Qamişlo û Amûdê koçberên Serê Kaniyê û Til Temir, li 375 dibistanan bicih bûne, û bi wê yekê, 65 Hezar xwendekar nikarin bixwînin.

Li gorî Rêveberiya Dibistanên Hesekê, tevî zarokên dibistanên Hesekê, Qamişlo û Amûdê, zarokên koçber jî bê xwendin mane, û wê yekê karê Desteya Perwerdeyê li Cizîra Rojavayê Kurdistanê aloztir kiriye.

Li Hesekê, Qamişlo û Amûdê koçberên Serê Kaniyê û Til Temir li 375 dibistanan bicîh bûne, di encam de 65 hezar xwendekar nikarin bixwînin.

Êrîşa Tirkiyê û grûpên çekdar ên opozisyona Sûriyê bo ser Rojavayê Kurdistanê, bû sedem ku bi hezarên malbatan ji Serê Kaniyê û Til Temir koçber bibin û berê xwe bidin bajarên Hesekê, Qamişlo û Amûdê û li dibistanên wan bajaran bicîh bibin, vê yekê kir ku bi deh hezaran zarok ji proseya xwendinê bêpar bibin.

Hevserokê Desteya Xwendinê li Cezîrê, Mihemed Salih Ebdo dibêje, “Niha koçber li zêdeyî 375 dibistanan bicîh bûne, herwiha hijmara xwendekarên ku niha li derveyî proseya xwendinê ne, navbera 60 heta 65 hezar xwendekar derbs kiriye, hevdem 4 hezar mamoste jî ji proseya perwerdeyê dûr ketin e.”

Ne tenê zarokên dibistanên Hesekê, Qamiçlo û Amûdê ji xwendina xwe bêpar bûne, herwiha zarokên koçber jî bê xwendin mane, vê yekê karê Desteya Perwerdeyê li Cezîra Rojavayê Kurdistanê aloztir kiriye.

Endama Rêveberiya Dibistanên Hesekê, Şêrîn Ibrahîm jî diyar dike, “Bi rastî ne tenê zarokên me yên koçber zerar dîtin e, herwiha zarokên me yên li van dibistanan jî dixwendin ji fêrkirinê dûr ketin e, ji ber li van dibistanan koçber bicîh bûne, lewra niha daxwaz tê kirin, ku ev dibistan ji koçberan bên valakirin, daku zarok bikaribin careka din li xwendina xwe vegerin û jiyana wan sayî bibe.”

9ê Cotmeha îsal artêşa Tirkiyê û grûpên çekdar ên opozisyona Sûriyê li jêr navê ‘Kaniya Aştiyê’ êrîşî Rojavayê Kurdistanê kirin, di encam de li gor çavkaniyên Rêveberiya Xweser û Neteweyên Yekbûyî zêdeyî 200 sivîlan canê xwe ji dest dan û bi hezaran birîndar bûn, herwiha zêdeyî 300 hezar sivîl jî koçber bûn.