Serokê Herêma Kurdistanê Nêçîrvan Barzanî êrişa mûşekî ya Hewlêrê bi tundî şermezar kir û bang li NY û encumena asayişa navdewletî kir metirsiya wê êrişî cidî bigirin.

Serokê Herêma Kurdistanê Nêçîrvan Barzanî li ser êrişa mûşekî ya şeva borî ya Hewlêrê peyamek belav kir.

Nêçîrvan Barzanî di peyamê de dibêje, di êrişa terorîstî ya Hewlêrê de kesek hat kuştin û 9 kes jî birîndar bûn. Em bi tundî wê êrişê şermezar dikin û sersaxiyê didin malbat û mirovên qurbaniyan û hêviya şîfaya acîl jî bo birîndaran dixwazin.

Nêçîrvan Barzanî bang li encumena asayişa navdewletî û NY jî kiriye, metirsiya wê êrişê cidî bigirin û bi rêka teşwîqkirina hikûmeta Iraqê bo bicîhanîna Destûrê û madeya 140, pêşiya êrişên bi wî rengî li ser Herêma Kurdistanê bigirin.

Serokê Herêma Kurdistanê her wiha bang li serokwezîrê Iraqê û fermandeyê giştî yê hêzên çekdar yên Iraqê û fermandeyê hêzên hevpeyman li Iraqê kiriye bi lez mekanîzma hemahengiya bi Herêma Kurdistanê re aktîf bikin û hêzên asayiş û Pêşmerge bi hêz û artêşa Iraqê û hêzên hevpeyman re bi rengekî hemaheng kar bikin.

Nêçîrvan Barzanî daye xuyakirin jî, nebûna hemahengiyê û hebûna hindek hêz û komên çekdarî yên li derveyî ferman û desthilata hikûmeta Iraqê, bûne sebeba alozbûna deverê û wisa kiriye ku her dem tehdîd li ser Herêma Kurdistanê hebe. Ji ber wê jî “ez bang li serokwezîrê Iraqê dikim bi lez komîteyeka hevbeş ya hikûmeta Kurdistanê û hikûmeta Iraqê dest bi lêkolînê bike û di zûtirîn dem de kesên ku ew êriş kirine, bibînin û bidin sizakirin”.